घाइते हिरो फर्किएपछि ‘गोर्खा वारियर २’ छायांकन सुचारु
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/12/ritesh-chams-1.jpg)
काठमाडौं । भीरबाट खसेर गम्भिर घाइते अभिनेता सुटिङ सेटमा फर्किएपछि अवरुद्ध ‘गोर्खा वारियर २’को छायांकन सोमबारदेखि सुचारु भएको छ ।
गतसाता फिल्मका मुख्य अभिनेता रितेश चाम्स सिन्धुलीमा भइरहेको छायांकनको क्रममा भीरबाट खसेका थिए । उनको घाँटीमा गहिरो चोट लागेको थियो । घाउ केही निको भएपछि उनले सोमबारदेखि नै सुटिङ सेट ज्वाइन गरेका हुन् ।
निर्देशक मिलन चाम्सका अनुसार मेकअपले अभिनेता चाम्सको घाँटीको घाउलाई पुरेर सुटिङ सुचारु गरिएको हो । सिन्धुलीको सेड्युल यसैसाता सकिने भएपनि रितेश घाइते भएपछि ढिलिएको थियो ।
आगामी साता छायांकन दमौलीमा हुने भएको छ । सुटिङ सेटमा फर्कनुअघि अभिनेता चाम्सले नयाँ जीवन पाएको भन्दै आफ्नो स्वास्थ्य लाभको कामना गर्ने सबैलाई धन्यवाद दिएका छन् ।
‘हजुरहरुको आशिर्वादले गर्दा स्वास्थ्यमा सुधार भई सुटिङको काममा फर्किएको छु’ उनले लेखेका छन्, ‘आफूले के पाएँ भन्दा पनि के दिन सकेँ भन्ने कुरा महत्वपूर्ण हुन्छ भन्ने मेरो मान्यता हो ।’