गण्डकीले एपीएफलाई दियो १०७ रनको लक्ष्य

काठमाडौं । प्रधानमन्त्री कप राष्ट्रिय पुरुष क्रिकेट प्रतियोगिताको समूह ‘ए’अन्तर्गत आज जारी खेलमा गण्डकी प्रदेशले विभागीय टोली सशस्त्र प्रहरी बलको एपिएफ क्लबलाई १०७ रनको विजय लक्ष्य दिएको छ ।

मूलपानी क्रिकेट मैदानमा एपिएफका कप्तान शरद भेसावकरले टस जितेर फिल्डिङ रोजेपछि ब्याटिङमा उत्रिएको गण्डकीले ४६ ओभरमा सबै विकेट गुमाएर १०६ रनको योगफल तयार गरेको हो ।

गण्डकीका लागि ओपनर समीर कँडेलले ११४ बल खेलेर दुई चौकासहित सर्वाधिक ३६ रन बनाउनु बाहेक अन्य खेलाडीले २० को आँकडा पार गर्न सकेनन् । अर्का ओपनर अर्जुन कुमाल शून्यमा आउट हुँदा विष्णु पाण्डे र दीपेश खत्रीले १५/१५ रनको योगदान गरे ।

एपीएफको कसिलो बलिङसामु टिक्न नसकेका गण्डकीका अन्य ब्याट्सम्यानले उल्लेख्य प्रदर्शन गर्न सकेनन् ।

एपीएफका लागि १० ओभरमा मात्र ११ रन खर्चेका कमल ऐरीले ३ मेडनसहित सर्वाधिक चार विकेट लिए । अविनाश बोहरा र कप्तान शरदले २/२ विकेट लिँदा किशोर महतोको खातामा एक विकेट रह्यो ।

पहिलो खेलमा कणौलीसँग ५ विकेटले पराजित भएको गण्डकीले दोस्रो खेलमा प्रदेश नम्बर १ लाई दुई विकेटले पराजित गरेको थियो । त्यस्तै, पहिलो खेलमा प्रदेश १ लाई १३५ रनले पराजित गरेको एपीएफको यो दोस्रो खेल हो ।