चन्द्रागिरी हिल्सको आइपीओ शुक्रबार बाँडफाँड हुने, कतिले पाउँदैछन् आइपीओ ?

काठमाडौं । चन्द्रागिरी हिल्सको आइपीओ शुक्रबार (भोलि) बाँडफाँड हुने भएको छ । शुक्रबार बिहान साढे १० बजे कम्पनीको आईपीओ बाँडफाँड हुने ग्लोबल आइएमई क्यापिटलले जनाएको छ ।

चन्द्रागिरी हिल्सको आइपीओमा माग भन्दा १७.५३ बढीको आवेदन परेको थियो । कम्पनीको आइपीओ निष्काशन तथा बिक्री प्रबन्धक ग्लोबल आइएमई क्यापिटलका अनुसार पुस २८ गतेसम्म सर्वसाधारणका लागि खुला गरिएको कम्पनीको आईपीओको बाँडफाँड शुक्रबार हुने भएको छ ।
कम्पनीको शेयरमा उच्च आवेदन परेकोले यस कम्पनीको शेयरमा आवेदन दिएका योग्य आवेदनक मध्ये नै ११ लाख १२ हजार ३३६ जनाको हात खाली हुने भएको छ ।

कम्पनीको आईपीओमा १२ लाख ५१ हजार ९ सय ३८ जनाको आवेदन परेको छ । कम्पनीले जम्मा १५ लाख ३४ हजार ९१ कित्ता सेयर निष्कासन गरेको हो ।

६१ हजार ३ सय ६४ कित्ता कम्पनीका कर्मचारीलाई ७६ हजार ७ सय ५ कित्ता म्युचुअल फण्डलाई र बाँकी १३ लाख ९६ हजार २२ कित्ता सर्वसाधारणको लागि निष्काशन गरेको हो ।

कम्तीमा १० कित्ता प्रतिव्यक्तिलाई वितरण गर्दा उक्त कम्पनीको आईपीओ १ लाख ३९ हजार ६ सय २ जना भाग्यमानी लगानीकर्ताहरुले मात्र पाउनेछन् । आईपीओ निष्काशन पश्चात कम्पनीको चुक्ता पूँजी एक अर्ब ५३ करोड रुपैयाँ पुग्नेछ ।