माओवादी महाधिवेशन : समूहगत सुझाव पेस गर्नेक्रम जारी

काठमाडौं । नेकपा (माओवादी केन्द्र) को आठौं महाधिवेशनअन्तर्गत जारी बन्द सत्रमा दोस्रो दिन पनि समूहगत छलफलका निष्कर्ष पेस गर्ने क्रम जारी छ ।

अध्यक्ष पुष्पकमल दाहाल ‘प्रचण्ड’ बाट प्रस्तुत ‘२१औं शताब्दीमा समाजवादको नेपाली बाटो’ शीर्षकको वैचारिक तथा राजनीतिक दस्तावेज र स्थायी कमिटी सदस्य देवप्रसाद गुरुङबाट प्रस्तुत विधान मस्यौदामाथि मंगलबार समूहगत छलफल भएको थियो ।

२५ समूहमध्ये हिजो ११ समूहले छलफलका निष्कर्ष पेस गरेका थिए। हिजो सल्लाहकार समूहको तर्फबाट रामनारायण बिडारी, प्रदेश २ बाट सत्यनारायण भगत, आयोगको तर्फबाट टंक राई, गण्डकी प्रदेशबाट गायत्री गुरुङ, प्रदेश नं. १ बाट अजम्बर काम्वाङ राई र हर्कबहादुर नेम्बाङले छलफलका निष्कर्ष बन्दसत्रमा प्रस्तुत गरेका थिए ।

त्यस्तै प्रवास समन्वय समितिबाट मनऋषि धिताल, वागमती प्रदेशबाट सरल सहयात्री, केन्द्रीय विभागबाट गीता पनेरु, सुदूरपश्चिम प्रदेशबाट मिनबहादुर कँवर र कर्णाली प्रदेशबाट विमला केसीले समूहको निष्कर्ष प्रस्तुत गरेका थिए ।

आज बाँकी समूहले छलफलका निष्कर्ष पेस गरेपछि अध्यक्ष प्रचण्डले जवाफ दिने छन् । त्यसपछि सुझावसमेत समेटेर प्रतिवेदन पारित हुनेछ । प्रतिवेदन पारित भएपछि नेतृत्व चयनको चुनावी प्रक्रिया सुरू हुनेछ ।