माओवादीमा अधुरो केन्द्रीय समितिबाट पदाधिकारी चयन गर्न खोजिएको भन्दै असन्तुष्टि

काठमाडौं । नेकपा (माओवादी केन्द्र) को आठौं महाधिवेशनबाट निर्वाचित केन्द्रीय समितिको पहिलो बैठक आज बस्दैछ ।

ललितपुरमा आज बस्ने बैठकबाटै पदाधिकारी चयन गर्ने घोषणा हिजो अध्यक्ष पुष्पकमल दाहाल ‘प्रचण्ड’ले बन्द सत्रमा घोषणा गरेका थिए। तर, माओवादीको केन्द्रीय समितिले अझै पूर्णता पाएको छैन । हिजो बन्दसत्रबाट प्रचण्डले २३६ जनाको मात्रै नाम घोषणा गरेका थिए ।

माओवादीले विधानमा केन्द्रीय समिति २९९ जनाको हुने व्यवस्था गरेको छ । विधानअनुसार अझै पनि ६३ जनाको पद रिक्त छ । समितिलाई पूर्णता नदिइ गरिने पदाधिकारीको चयन कति कानूनसम्मत हुन्छ भन्ने प्रश्न उठ्न थालेको छ ।

माओवादी विधानमा केन्द्रीय समितिले पदाधिकारी चयन गर्ने उल्लेख गर्दा पूर्णकेन्द्रीय समितिकै परिकल्पना गरेको बताइन्छ । त्यसो हुँदा पूर्ण भइनसकेको समितिले पदाधिकारी चयन गर्दा प्रश्न उठ्न सक्ने भन्दै पार्टीकै कतिपय नेताहरूले आपत्ति जनाएका छन् ।

हरेक केन्द्रीय सदस्यलाई पदाधिकारी बन्ने हक भएकाले समितिलाई पूर्णता नदिइ पदाधिकारी नियुक्त गरिँदा उनीहरूको हक कुण्ठित हुने पनि कतिपयको भनाइ छ ।