नेपाल सीमावर्ती बिहारमा कर्फ्यु घोषणा : ओमिक्रोन संक्रमण उकालो

पटना । नेपाल सीमावर्ती भारतीय राज्यमा ओमिक्रोन संक्रमण फैलिएपछि रात्रीकालिन कर्फ्यु घोषणा गरिएको छ । राती १० बजेदेखि ५ बजेसम्म लागू हुने कर्फ्युमा सपिङ मल, स्वीमिङ पुल, क्लब, सिनेमा घर, रंगशाला, जिमखाना बन्द हुनेछन् ।

जनवरी ६ देखि सुरु हुने कर्फ्यु जनवरी २१ सम्म लागू हुने मुख्यमन्त्री नितिश कुमारले जनाएका छन् । उनकै अध्यक्षतामा बसेको कोभिड सम्बन्धी उच्चस्तरीय कार्यदलको बैठकले कर्फ्यु लागू गर्ने निर्णय गरेको हो ।

बैठकपछि मुख्य सचिव अमिर सुभानीले प्रतिबन्धहरुबारे घोषणा गरेका हुन् । सबै सरकारी र निजी कार्यलयमा ५० प्रतिशत कर्मचारी राखेर काम गर्न पाइने भएको छ ।

नेपालसँग सीमा जोडिएको राज्य बिहारमा ओमिक्रोन संक्रमण फैलनेक्रममा छ । सोही बाटो हुँदै नेपालमा समेत मानिसहरु आवतजावत गर्ने भएकाले नेपालमा संक्रमणको जोखिम अझै बढेको छ ।