निजगढ विमानस्थलका लागि टाँगिया बस्ती हटाउन १० अर्ब मुआब्जा लाग्ने

काठमाडौं । निजगढ अन्तर्राष्ट्रिय विमानस्थल निर्माणको प्रक्रिया अघि बढाउन सरकारले छलफल थालेको छ । विहीबार प्रधानमन्त्री शेरबहादुर देउवा र पूर्वप्रधानमन्त्रीहरूसहितलाई राखेर हालसम्म भएका काम र अबको प्रक्रियाबारे बालुवाटारमा प्रस्तुतिकरणसमेत भएको छ ।

बैठकमा पूर्वप्रधानमन्त्रीहरू पुष्पकमल दाहाल, माधवकुमार नेपाल, झलनाथ खनालसमेत सहभागी थिए । बैठकपछि पत्रकारसँग कुरा गर्दै संस्कृति पर्यटन तथा नागरिक उड्डयन मन्त्री प्रेम आलेले निजगढ विमानस्थल बनाउने प्रक्रियालाई अब अघि बढाइने बताए ।

उनले सबैभन्दा पहिले टाँगिया बस्ती हटाउन मुआब्जाको प्रक्रिया अघि बढ्ने जानकारी दिए । नागरिक उड्डयन प्राधिकरणले टाँगिया बस्ती हटाउन करिब १० अर्ब मुआब्जा दिनुपर्ने प्रतिवेदन पेस गरेको छ ।

बस्ती हटाइसकेपछिमात्र रुख कटानको प्रक्रिया अघि बढ्ने मन्त्री आलेले बताए । विमानस्थल निर्माणका लागि बजेटको व्यवस्था विशेषगरी मुआब्जाका लागि यसैपटक गरिने र लगानीको मोडालिटीबारे छलफल हुने उनले जानकारी दिए ।