प्रचण्ड-माधव पक्षले बहिष्कार गर्‍यो निर्वाचन आयोगको कार्यक्रम

विराटनगर । विभाजित नेकपाको प्रचण्ड-माधव पक्षले आसन्‍न निर्वाचन कार्यक्रमसम्बन्धी निर्वाचन आयोगले गरेको कार्यक्रम बहिष्कार गरेको छ ।

जिल्ला प्रशासन कार्यालय मोरङमा मतदाता नामावली अद्यावधिक गर्नेबारेको कार्यक्रम चलिरहँदा सो पक्षले नाराबाजी गरेका छन् । नेता पारुल क्षेत्रीले विरोधस्वरुप प्रधानमन्त्रीविरुद्ध नारा लगाउन थालेपछि प्रमुख जिल्ला अधिकारी कोशहरि निरौलाले क्षेत्रीलाई रोके । लगत्ते नेता क्षेत्रीले बहिष्कार गरेर कार्यक्रम स्थलबाट बाहिरिए ।

प्रचण्ड-माधव पक्षका कार्यकर्ताले अदालतमा मुद्दा चलिरहेको र संसद पुन:स्थापनाको पक्षमा आवाज उठिरहँदा निर्वाचनको तयारी थाल्नु अनुचित रहेको बताए ।

कार्यक्रममा सुरक्षा निकाय प्रमुख, नेपाली कांग्रेस मोरङका सचिव मोदराज घिमिरे, राप्रपा मोरङका सचिव प्रदिप सुवेदी, जनमत पार्टी, मंगोल नेशनल अर्गनाइजेसन, जनता समाजवादी पार्टी नेपाल, नेकपा (ओलीसमूह) का प्रतिनिधिहरु उपस्थित थिए ।

कार्यक्रममा निर्वाचन आयोगले सहभागी दलहरूलाई १७ बुँदे मतदाता नामावली दाबी तथा विरोध कार्यक्रम, २०७७ सार्वजनिक गर्दै निर्वाचनको तयारी तीव्र बनाएको जनाएको छ । निर्वाचनलाई लक्षित गर्दै कार्यालयले मोरङका १७ वटै स्थानीय तहमा सहायक नाम दर्ता अधिकारी पनि तोकिसकेको छ । गत पुस ५ गते प्रतिनिधिसभा विघटनको निर्णयसँगै आगामी वैशाख १७ र २७ मद्यावधि निर्वाचन तोकिएपछि आयोगले चुनावको तयारी थालेको छ ।