युरोपमा कोभिड-१९ को नयाँ भेरिएन्ट ‘डेल्टाक्रोन’ संक्रमण पुष्टि

काठमाडौं । युरोपेली मुलुक साइप्रसमा कोरोनाभाइरसको नयाँ भेरिएन्ट ‘डेल्टाक्रोन’ संक्रमण पुष्टि भएको छ । डेल्टा र ओमिक्रोनको संयोजनबाट बनेको नयाँ भेरिएन्ट फेला परेको जानकारी वैज्ञानिकले दिएका छन् ।

युनिभर्सिटी अफ साइप्रस वैज्ञानिक लियोनडिओस कोस्ट्रिकिसले डेल्टोक्रोन भेरिएन्ट भेटिएको जनाएका हुन । कोस्ट्रिकिसको टिमले अहिलेसम्म २५ जनामा यो हाइब्रिड भेरिएन्ट फेला पारेको सीएनबीसी न्युजमा प्रकाशित खबरमा उल्लेख छ ।

शुक्रबार सिग्मा टेलिभिजनलाई अन्तर्वार्ता दिनेक्रममा जीव विज्ञानका प्रोफेसर कोस्ट्रिकिस यस्तो लहर कस्तो हुन्छ भन्ने कुरा भविष्यले देखाउने बताएका छन् ।

अहिले संक्रमण उच्च देखिएका मुलकमा डेल्टा र ओमीक्रोन दुवै उत्तिकै देखिएको छ । यी दुवै भेरिएन्ट एकै व्यक्तिमा संक्रमण हुँदा नयाँ भेरिएन्टको जन्म हुनसक्ने कुरा विज्ञहरुले यसअघि नै आँकलन गरेका थिए ।