विद्यार्थीलाई खोप सुनिश्चित गर्न शिक्षा मन्त्रालयको आग्रह

काठमाडौं । शिक्षा मन्त्रालयले विद्यार्थीहरुलाई कोभिड–१९ विरुद्धको खोप लगाएको सुनिश्चितता गर्न विद्यालयहरुलाई निर्देशन अनुरोध गरेको छ । माघ १५ गतेदेखि २० गतेसम्म खोप लगाउने प्रयोजनको लागि विद्यालयहरु खुल्ने तयारीमा छन् तर पठनपाठन भने अनिश्चित नै छ ।

साथै मन्त्रालयले खोप लगाएका विद्यार्थीहरूको नाम सहितको विवरण अध्यावधिक गर्न विद्यालयहरुलाई निर्देशन दिएको छ । नजिकको स्वास्थ्य केन्द्रसँगको समन्वयमा विद्यार्थीलाई खोप लगाउन र कसैलाई पनि नछुटाउन पनि मन्त्रालयले भनेको छ ।

प्रवक्ता दीपक शर्माद्वारा जारी विज्ञप्तिमा माघ १५ गतेसम्म कोरोनाभाइरस संक्रमणको जोखिमले विद्यालय बन्द गरिएको कुरा पनि उल्लेख छ । काठमाडौं उपत्यकाका तीन जिल्लाका प्रशासनले भने माघ १५ गतेपछि पनि भौतिकरुपमा पढाइ गर्न नपाइने निर्णय गरेका छन् । यस्तो निर्णय अर्को सूचना जारी नभैञ्जेल कायम रहने सम्बन्धित जिल्ला प्रशासनले गरेका छन् ।

पछिल्लोसमय विद्यार्थीहरु पनि धमाधम संक्रमित हुन थालेपछि सरकारले खोप प्रयोजनका लागि विद्यालय खुलाउन लागेको हो । विद्यार्थीलाई फाइजर र मोडर्ना खोप लगाउने सरकारको तयारी छ ।