कर्णालीमा एमालेले सशक्त प्रतिपक्षीको भूमिका निभाउने

सुर्खेत । नेकपा एमालेले कर्णाली प्रदेशसभामा सशक्त प्रतिपक्षीको भूमिका निभाउने भएको छ । कर्णाली सरकारको कार्यसम्पादन चुस्न बनाउन प्रतिपक्षीको भूमिका कमजोर रहेको आरोप लाग्दै आएको थियो ।

आज दिउँसो एक बजेका लागि प्रदेश सभाको वैठक बोलाइएको छ । एमालेले सदनमा सरकारका गलत कार्यको भण्डाफोर गर्ने तयारी भइरहेको नेताहरुले बताएका छन्
।

अध्यादेशमार्फत बजेट ल्याएको कर्णाली प्रदेश सरकारले टुक्रे आयोजना बनाएको, कार्यकर्तामुखी बजेट वितरण गरे, पुराना आयोजना सम्पन्न नहुँदै अलपत्र पार्ने काम भएको जस्ता आरोप सरकारमाथि लागेका छन् ।

यस्तै, एमाले सांसदहरु भएको निर्वाचन क्षेत्रमा बजेट विनियोजन गर्दा पक्षपातपूर्ण भूमिका सरकारले देखाएको आरोप प्रमुख प्रतिपक्षी दल एमालेको छ ।

एक जिल्ला एक रंगशाला निर्माण देखि एक पालिका एक नमूना विद्यालय जस्ता कार्यक्रमलाई टुक्रा पारेर सरकारले विकास गर्न नखोजेको भन्दै एमाले चिढिएको छ ।

‘अबहामी सदनमा रचनात्मक भूमिका निर्वाह गर्छौं । सदनमा सरकारलाई खबरदारी गर्छौं,’ एमाले सांसद पद्मा खड्काले भनिन्, ‘विगत हेर्नु भन्दा पनि हामी वर्तमान हेर्छौं र जनताका गुनासा सम्वोधन गराउन सदनमा शसक्त भूमिका खेल्छौं ।’