प्रमोद र रुक्सानाको ‘नोगेन’ दुई दिनमै उक्लियो एक नम्बर ट्रेन्डिङमा

काठमाडौं । गायक प्रमोद खरेलले द भ्वाइस किड्सकी प्रतिस्पर्धी बालिका रुक्सना लिम्बुसँग मिलेर गाएको गीत प्रशंसित बनेको छ । युट्यूवमा अपलोड भएको दुई दिनमै यो गीत नेपालको नम्बर १ ट्रेन्डिङमा उक्लिन सफल भएको छ ।

सोमबार सार्वजनिक भएको ‘नोगेन’ बोलको गीत पाँच घन्टाभित्रै ट्रेन्डिङमा अटाउन सफल भएको थियो । अहिलेसम्म गीतले १२ लाखभन्दा बढी भ्यूज पाइसकेको छ । गीतमा शब्द र संगीत महेश खड्काको रहेको छ ।

रुक्साना द भ्वाइस किड्सकी फाइनलिस्ट हुन् । उनी प्रमोदको टिममा थिइन् । फाइनल जित्न नसके पनि प्रमोदले उनलाई आफूसँग युगल गीत गाउने अवसर दिएका हुन् । प्रमोदको यो प्रयास सफल भएको छ ।

गीतमा ८ हजारभन्दा बढीले प्रतिक्रिया जनाइसकेका छन् । अधिकांस प्रतिक्रिया सकारात्मक छन् । एक लाख १० हजारले गीतमा लाइक बटम थिचेका छन् ।

गीतका शब्द र मेलोडी पक्ष निकै बलियो छ । गीतको भिडियोमा प्रमोद र रुक्साना नै फिचर्ड छन् । भिडिओ निर्देशन मिनाक्षी कोइरालाले गरेकी हुन् ।