२४ लाख डोज कोरोना खोपबारे स्वास्थ्यमन्त्रीको प्रष्टोक्ति- हराएको छैन, फागुन २ सम्ममा सार्वजनिक हुन्छ (भिडिओ)

काठमाडौं । स्वास्थ्य तथा जनसंख्यामन्त्री विरोध खतिवडाले कोरोनाविरुद्धको २४ लाख डोज खोप नहराएको प्रष्ट्याएका छन् ।

मन्त्रालय सम्हालेयताका १०० दिनमा आफूले गरेका काम सार्वजनिक गर्दै उनले खेर गएको र गाउँगाउँमा लगाइएको खोपको विवरण नआउँदा केही समस्या देखिएको बताए ।

‘टोल-टोलमा स्वास्थ्यकर्मीहरू खोप बोकेर जानुभएको छ । त्यसको रेर्कड संस्थागतरूपमा माथिसम्म आइपुगेको छैन । यहाँ बाटोमा रहेको ग्यापको कुराहरु रहयो’, मन्त्री खतिवडाले भने, ‘खेर गएको खोपको रेकर्ड आइपुगेको छैन । १० वटा खोपको प्याकेटमा त्योभन्दा कम लगाए बाँकी खेर जान्छ । अनि प्रत्येक ठाउँमा प्रत्येक दिन यस्ता खेर गएकाहरूको संख्याको तथ्यांक आउन बाँकी छ ।’

छानबिन समितिले फागुन २ गतेभित्र प्रतिवेदन सार्वजनिक गर्ने मन्त्री खतिवडाले जानकारी दिए ।

हराएको खोप छानबिनका लागि मन्त्रालयले डा. गुणराज लोहनीको संयोजकत्वमा परिवार कल्याण महाशाखा निर्देशक विवेककुमार लाल मन्त्रालयकी प्रवक्ता डा. संगीता मिश्रासहितको ५ सदस्यीय समिति बनाएको थियो ।

मन्त्री खतिवडाले भने,‘समितिबाट आएको प्रतिवेदन जानकारी गराउछौं । त्यसमा हामीलाई प्राप्त यहाँबाट कहाँ-कहाँ कति पठाइयो र कति खेर गयो सबै सूचना हुनेछ ।’