संसद बैठकअघि माओवादी संसदीय दलको बैठक बस्दै, एमसीसीबारे निर्णय लिने

काठमाडौं। संसद बैठक बस्नुअघि नेकपा (माओवादी केन्द्र)को संघीय संसदीय दलको बैठक बस्दैछ । आजको संसदमा एमसीसी टेबल हुने सम्भावनाबीच माओवादी केन्द्रले बिहान ८ बजे माओवादीको संसदीय दल बैठक बस्न लागेको हो ।

बैठकमा एमसीसीबारे माओवादीले निर्णय लिने सम्भावना छ । माओवादीले यथास्थितिमा एससीसी पारित गर्न नहुने बताइरहेको छ ।

संसद बैठक १ बजे बस्दैछ । संसद सचिवालयले हिजो जारी गरेको सम्भावित कार्यसूचीमा एमसीसीको विषय राखिएको छैन । हिजो प्रधानमन्त्री र कानूनमन्त्री लगायतले आज एमसीसी टेबुल गर्ने बताएका थिए ।

संसद बैठक बस्नुअघि कार्यव्यवस्था परामर्श समितिको बैठक बस्नेछ । र उक्त समितिको बैठकले संसदको कार्यसूची तय गर्नेछ । कार्यव्यवस्था समितिले संसदको कार्यसूचीमा एमसीसी पनि राख्ने सम्भावना छ ।