नेपाली ट्रान्सजेन्डर मोडल अञ्जलीद्वारा न्यूयोर्क फेसन वीकमा डेब्यु

काठमाडौं । नेपालकी पहिलो ट्रान्सजेन्डर मोडल अञ्जली लामाले विश्वचर्चित न्यूयोर्क फेसन विकमा डेब्यु गरेकी छिन् । नेपाली फेसन डिजाइनर प्रबल गुरुङले आगामी फल-विन्टर २०२२ को लागि तयार पारेको पहिरनमा अञ्जलीले ¥याम्प नापेकी हुन् ।

विश्वकै प्रतिष्ठित मानिने न्यूयोर्क फेसन विकको रनवेमा हिँडेपछि अञ्जलीले आफ्नो सपना पुरा भएको बताएकी छिन् । ‘अन्ततः मेरो सपना पुरा भएको छ’ इन्स्टाग्राममा अञ्जली लेख्छिन्, ‘म यसका लागि प्रबल गुरुङलाई धन्यवाद भन्न चाहन्छु ।’

संसारभरका सुपरमोडलको सपना न्यूयोर्क फेसन रनवेमा हिँड्नु हुन्छ । सन् २०१७ मा भारतको ल्याक्मे फेसन विकबाट फेसन करिअर थालेकी अञ्जली प्रबलको डिजाइनमा आकर्षक देखिएकी छिन् । काठमाडौं बानेश्वरका प्रबलले अमेरिकी फस्टलेडी मिसेल ओबामादेखि थुप्रै बलिउड र हलिउड सेलेव्रिटीलाई आफ्नो डिजाइनमा सजाइसकेका छन् ।

अञ्जलीलाई लिएर नेपालमा फिल्म पनि निर्माण भएको छ । नुवाकोटमा जन्मिएकी अञ्जलीले लिंग परिवर्तन गरेर सुपरमोडलतर्फको यात्रा थालेकी थिइन् । उनले लिंग परिवर्तन गर्नुलाई खुशिको क्षण भएको बताएकी थिइन् । गुरुङको डिजाइनमा यसअघि नेपालकी वर्षा थापा प्रस्तुत हुन्थिन् भने यसपटक अञ्जलीले मौका पाएकी छिन् ।