आन्दोलनको मारमा बानेश्वरका व्यापारी (भिडिओ)
![](https://www.nepalpress.com/wp-content/uploads/2022/02/birod-shop.jpg)
काठमाडौं । नयाँ बानेश्वरको सडक यतिबेला एमसीसीको विरोधमा युद्धमैदान बनिरहेको छ । यो साताको तीन दिन आन्दोलनकारी र प्रहरीको घम्साघम्सी पर्यो ।
एमसीसीको विरोधमा प्रर्दशनकारी नाराजुलुश गर्दै नयाँ बानेश्वर आइपुग्दासम्म माहोल सामान्य नै हुन्छ । जब प्रर्दशनकारीले निषेधित क्षेत्र तोड्न खोज्छन । त्यसपछि सुरु हुन्छ प्रर्दशनकारी र प्रहरीको घम्साघम्सी । ४ गतेदेखि नयाँबानेश्वर यस्तै बनिरहेको छ ।
एमसीसी संसदबाट अनुमोदन गराउने हतारो सरकारलाई भएपनि विरोध प्रदर्शन भइरहेको हो । प्रर्दशनमा प्रहरीले अश्रुग्यासदेखि पानीको फोहोराको सहयोगता भीड तितरवितर बनाउने प्रयास गरिरहेको छ ।
झडप नियन्त्रणमा नआएपछि प्रहरीले आइतबार बलुेट गोली चलाएको छ । आन्दोलनकारीले प्रहार गरेको ढुंगाले दर्जनौं प्रहरी घाइते भएका छन् ।
यी दृश्यको प्रत्यक्षदर्शी बनिरहेका छन् नयाँ बानेश्वरका व्यापारीहरु । यो साता मात्रै माइतीघरदेखि नयाँबानेश्वर सडकका पसल, बैंक, अस्पताल, होटल लगायतका दर्जनौं व्यवसायहरु दिनभर बन्द गर्नुपर्यो ।
आन्दोलन सुरु हुने वितिकै पसल तथा बैंकहरुको सटर बन्द तान्छन् व्यापारीहरु । प्रायः नियमित जस्तै यस्ता प्रदर्शनका कार्यक्रममा आजित छन् यहाँको व्यवसायीहरु ।
उनीहरु कहिले प्रर्दशनकारी र प्रहरीको झडप सकिएला र पसल खोलौँला भन्ने आसमा बसिरहेका हुन्छन् । केही व्यापारीहरु बोनी नै नगरी घर जानुपरेको गुनासो गर्छन । कहिले सम्म सटर बन्द गर्नुपर्ने हो भन्ने चिन्ताले सताएको व्यापारीहरु बताउँछन् । नयाँबानेश्वरमा तीनदिनदेखि भएको प्रर्दशनको कारण बन्द व्यवसायको नोक्सान त छदैछ । उल्टै प्रर्दशनकारीले प्रहार गरेको ढुंगाले व्यवसायीको सवारीसाधनमा पनि क्षति पुयाएको छ ।
आन्दोलन सुरु हुनेवितिकै सटर बन्द गरेर बस्नुपरेको थकाली भान्छाघरका क्याप्टेन सुवोध मगरले बताए । उनले भने,‘जुनजुन दिन आन्दोलन भयो त्यो दिन व्यापार ठप्पै छ । पुरै सटर नै बन्द गर्नुपर्छ । नत्र कति पो क्षति हुन्छ । तोडफोडले गर्दा हाम्रो डिजिटल बोर्डमा क्षति पुगेको छ । अब कता कताबाट ढुंगा आउछ । सटरहरु सबै झार्नुपरिहाल्यो ।’
एमसीसी राष्ट्रघाती भए खारेज गरिदिए यस्तो अवस्था नआउने उनी बताउँछन् । उनले संवेदनशील क्षेत्रमा आन्दोलन गर्न दिन नहुने पनि उनको धारणा रहेको छ । ‘कतिले ढुंगा खाइरहेका छन् कति घाइते भइरहेका छन् । यसको जिम्मेवारी कसले लिने । उनले आक्रोश पोख्दै भने, ‘सरकारले त पक्कै पनि लिदैन होला पक्कै पनि । यस्तो संवेदनशील क्षेत्रमा आन्दोलन गर्न दिन हुँदैन । निषेधित क्षेत्र नै कायम गरिराख्न दिन ठीक होला ।’
दिनहुँको आन्दोलनको बोनी पनि गर्न नपाएको गुनासो पोख्छन् नयाँ बानेश्वरमा पसल चलाइरहेका अर्का व्यवसायी अर्जुन घिमिरे । उनले भने, ‘निषेधित क्षेत्र तोडेर यो चोकमा प्रदर्शनकारीहरु आउँदा निकै समस्या हुन्छ । यहाँ भाडा पनि मंहगो छ । खै हुने कहिले सम्म यो अवस्था हो ? व्यापार व्यवसायमा ठूलो असर परेको छ । हाम्रो त बोनी नै भएको छैन ।’
दुवै क्षेत्रबाट कोही पनि आउन नपाउने भएकाले व्यापारको अवस्था नरहेको उनको भनाई छ । व्यापारिक क्षेत्रलाई खुला गरिदिएको भए राम्रो हुने उनले बताए ।
बानेश्वर चोकमा कस्मेटिक पसल चलाइरहेका सन्तोष सापकोटाले साँझ ५ बजे मात्र पसल खोल्न पाए । तीनदिनदेखि उनको पसलमा पनि व्यापार ठप्प छ । उनले भने, ‘बन्द भनेपछि मान्छे हिड्दैन मान्छे नहिडेपछि व्यापार हुदैन । दिनभरी पसल बन्द गरेर बस्नुपर्दा त ठूलो क्षति हुन्छ नै । अस्ति पनि ५ घण्टा बन्द भयो ।’