दैलेखको आठविसमा मेयर बन्न हानथाप, यी हुन आकांक्षी

सुर्खेत । स्थानीय तहको निर्वाचन नजिकिएसँगै दैलेखको पश्चिम क्षेत्रमा पर्ने आठविस नगरपालिकामा नेतृत्वका लागि नेताहरुको दौडधुप सुरु भएको छ ।

नेकपा एमाले र नेपाली कांग्रेसका नेताहरु नगरप्रमुखमा आफ्नो दावी बलियो बनाउन दौडधुपमा रहेका छन् ।

आगामी वैशाख ३० गतेका लागि तय भएको निर्वाचनका लागि आकांक्षीहरु बढ्दै गएका छन् । नेकपा एमालेबाट तर्क बडुवाल, तेजबहादुर महतारा, हालका नगरप्रमुख खड्गराज उपाध्यायले दावी गरहेका छन् । यस्तै, नगर कमिटि अध्यक्ष अम्मरबहादुर माझी पनि पार्टीले जिम्मेवारी दिए उम्मेदवार बन्ने दावी गर्छन् । उनीहरुले नेतृत्वसँग तीव्र लविङ गरिरहेका छन् ।

नेपाली कांग्रेसबाट प्रेमप्रकाश शाही, भुपेन्द्र शाही, नगरउपप्रमुख दिपा बोहोरा, कांग्रेस नगर सभापति अर्जुनबहादुर शाही लगायतले नगरप्रमुखका लागि तीव्र रुपमा लविङ सुरु गरेका छन् ।

उम्मेदवारका आकांक्षीहरुले आफू नगरप्रमुखको टिकट पाएको खण्डमा सहजै विजयी हुने सम्भावना रहेको भन्दै नेताहरुलाई विश्वस्त बनाइरहेका छन् ।

२०७४ सालको निर्वाचनमा ९ वटामध्ये चार वडामा कांग्रेस, चार वडामा एमाले विजयी भएका थिए । एक वटामा भने नेमकिपाले जित हात पारेको थियो ।