प्रचण्डको खुलासा- एमसीसी रोक्न ओलीलाई प्रधानमन्त्री अफर लिएर जाँदा अपमान गरे

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले केपी ओलीलाई प्रधानमन्त्री दिएर भने पनि एमसीसी रोक्न आफूले खोजेको खुलासा गरेका छन् ।

काठमाडौंको प्रज्ञा भवनमा पार्टी प्रशिक्षण कार्यक्रममा एमसीसीको सकसबारे कार्यकर्तालाई बुझाउँदै प्रचण्डले एमसीसी अनुमोदन हुन नदिने सबै प्रयास असफल भएपछि गठबन्धन जोगाउन व्याख्यात्मक टिप्पणीको बाटो लिएको बताएका हुन् ।

प्रचण्डको भनाइ उदृत गर्दै प्रशिक्षण भेलाका एक सहभागीले भने, ‘केपीलाई प्रधानमन्त्री दिएर पनि एमसीसी रोक्न सकिन्छ कि भनेर गएका हौं । तर, पूरै अपमान गरेपछि सर्प पनि मर्ने, लाठी पनि नभाँचिने लाइनमा गइयो ।’

आफूहरु ओलीसँग कुरा गर्न जाँदा सभामुखले राजीनामा दिनुपर्ने, नेकपा एसका १४ सांसदको पदमुक्तिको सूचना टाँस्नुपर्ने र नेकपाकालमा आफूहरूले ओलीमाथि लगाएको १९ बुँदे अभियोगपत्र फिर्ता लिनुपर्ने शर्त राखेपछि बेकार आइएछ भनेर हिँडेको प्रचण्डले बताए ।