वाइसिएललाई प्रचण्डको निर्देशन- २०६४ को चुनावमा जस्तै गर्नुपर्छ, लड्नलाई सहयोग चाहिए भन्नुस् (भिडिओ)

सिन्धुली । नेकपा (माओवादी केन्द्र)का अध्यक्ष पुष्पकमल दाहाल प्रचण्डले स्थानीय चुनावमा २०६४ सालको जस्तैगरि परिचालित हुन वाइसिएल कार्यकर्तालाई निर्देशन दिएका छन् ।

सिन्धुली जिल्ला पार्टी कार्यालय भवनको उद्घाटन सभालाई सम्बोधन गर्दै अध्यक्ष प्रचण्डले २०६४ सालको चुनाव वाइसिएलको भरमा जितेको भन्दै त्यस बेला वाइसिएल आयो भनेपछि जाली फटाहाहरू भाग्ने गरेको स्मरण गरे ।

प्रचण्डले भने– २०६४ को चुनावमा वाइसिएल आयो भनेपछि विरोधीहरूको सातो जान्थ्यो । जनताले आफ्ना छोराछोरी जसरी माया गर्थे र ढुक्कले माओवादीलाई भोट दिन्थे । अहिले त वाइसिएल पनि खै के हो मुर्झायो । तर अब यो दुई महिना गाउँ गाउँमा भोलेन्टियर खटाउनुस् । गुण्डागर्दी पनि अरूले पो गर्न थाले । अब वाइसिएलले तीनलाई ठेगान लाउनुस् । लड्नका लागि आवश्यक पर्‍यो भने केन्द्रमा भन्नुस्, सहयोग हुन्छ ।

आउने चुनाव माओवादीका लागि जीवन मरणको सवाल भएको भन्दै प्रचण्डले युद्धकालमा जस्तै दुई महिना खटिन कार्यकर्तालाई निर्देशन दिए ।