अध्यक्ष नियुक्तिको विरोधमा शेखर समूहले बोलायो तरुण र विद्यार्थीको समानान्तर भेला
काठमाण्डौं । नेपाल विद्यार्थी संघ र तरुण दलको अध्यक्ष मनोनयनप्रति असन्तुष्ट पक्षधरले चैत १४ मा अलग भेलाको आह्वान गरेका छन् ।
शेखर समूहको तरुण विद्यार्थी भेला चैत १४ दिउँसो १ बजे अनुपमफुड्ल्याण्डमा तय गरिएको छ ।
‘सभापतिज्यूले एकलौटी रूपमा नेविसंघ र तरुण दलको सभापति मनोनीत गरेको विषयप्रति हाम्रो गम्भीर आपत्ति छ,’ नेविसंघका पूर्वसभापति रञ्जित कर्णले भने, ‘त्यसको प्रतिवाद गर्नका लागि चैत १४ मा अलग भेला राखेका छौँ ।’
उनका अनुसार सो भेलामा नेविसंघका पूर्व अध्यक्षदेखि देशैभरका प्रतिनिधिहरू उपस्थित हुनेछन् ।
गत बुधबार सभापति शेरबहादुर देउवाले नेविसंघ र तरुण दलको अध्यक्षको मनोनयन गर्दा आफूहरू परामर्श नगरेको कोइराला पक्षधरको आरोप छ । देउवाले एकलौटीरूपमा पेलेको भन्दै केन्द्रीय समिति बैठकको संघारमा सानेपास्थित कांग्रेस केन्द्रीय कार्यालयअघि प्रदर्शन गरेका छन् ।