गहना लुटपाटमा संग्लग्न ४ जना पक्राउ

विराटनगर । मोरङको बेलवारी नगरपालिका-४ को बेतना सिमसार क्षेत्रमा गत ८ गते  चाँदीको गर-गहना लुटपाट भएको घटनामा संग्लग्न रहेको आरोपमा ४ जनालाई प्रहरीले पक्राउ गरेको छ ।

पक्राउ पर्नेहरुमा झपाको दमक नगरपालिका-३ का २५ वर्षीय सविन विश्वकर्मा, सिन्धुलीकाे बर्दिबास नगरपालिका-१ का ३४ वर्षीय मनोज ठाकुर, उदयपुरकाे रौतामाई गाउँपालिका-६ का २४ वर्षीय विशाल  विश्वकर्मा र सुनसरीकाे इटहरी-५ का २४ वर्षीय बादल विश्वकर्मा रहेका छन् ।

पक्राउ परेको यो समुहले चैत्र ८ गते बिहान पाथीभरा ज्वेलर्स एण्ड सप्लायर्स दमकका कर्मचारीले दमकबाट बर्दिबास लैजाँदै गरेको १३ केजी चाँदीका गर-गहना लुटपाट गरेको थियो ।

यसरी दमकबाट बर्दिबास लैजाँदै गरेको चाँदीका गहना लुटपाट भएको सूचना प्राप्त भएसँगै खोजतलासमा खटिएको इलाका प्रहरी कार्यालय बेलवारीको प्रहरीकाे टोलीले लुटपाटमा संग्लग्न मध्ये ४ जनालाई चाँदीका गहना सहित नियन्त्रणमा लिएको जिल्ला प्रहरी कार्यालय माेरङले जनाएकाे छ ।

घटनामा संग्लग्न अर्का एक जना फरार रहेको र उनको समेत खोजतलास भइरहेको तथा पक्राउ परेका व्यक्तिहरुको सम्बन्धमा थप अनुसन्धान भइरहेको इलाका प्रहरी कार्यालय बेलवारीले जनाएको छ ।