औरहीकी उपाध्यक्ष यादवले छाडिन् जसपा, कांग्रेस प्रवेश गर्ने तयारी

जनकपुरधाम । सिरहाको औरही गाउँपालिकाकी उपाध्यक्ष सीताकुमारी यादव जनता समाजवादी पार्टी (जसपा) परित्याग गरेकी छन् ।

स्थानीय तहको निर्वाचन नजिकिँदै गर्दा उपाध्यक्ष यादवले जसपा छाडेकी हुन् । औरही गाँउपालिका-३ की यादवले विज्ञप्ति जारी गरेर साधारण सदस्यसमेत नरहने गरी पार्टी परित्याग गरेको घोषणा गरेकी छन् ।

केन्द्रीय अध्यक्ष समक्ष निवेदन दिएपनि सुनवाइ नभएको, जिल्ला अध्यक्षलाई दिएको निर्देशन पालना नभएको र पार्टी हितविपरीत काम गर्नेलाई कारबाही नगरेको उनको भनाइ छ ।

पार्टीमा व्यक्तिवादी हाबी भएको, आफूमाथि अन्तर्घात गरेको, राम्रो कामको मूल्याकंन नगरेको र उल्टै अपमानित गर्ने जस्ता प्रवृत्तिले गर्दा पार्टी परित्याग गरेको उपाध्यक्ष यादवको आरोप छ ।

स्रोतका अनुसार उपाध्यक्ष यादव नेपाली कांग्रेसमा प्रवेश गर्न लागेकी हुन् । उनलाई प्रवेश गराउन औरही गाँउपालिका ३ मै नेपाली कांग्रेसले चैत २५ मा कार्यक्रम राखेको छ ।