निर्वाचनसम्बन्धी सामाजिक सञ्जालमा ‘हेट स्पिच’ को निगरानी गर्न संयन्त्र (भिडिओ)

काठमाडौं । निर्वाचन आयोगका प्रमुख आयुक्त दिनेशकुमार थपलियाले निर्वाचन आचारसंहिता पालना गर्न स्वयं राजनीतिक दलहरू गम्भीर हुनुपर्ने बताएका छन् ।

ललितपुरमा आज आयोजित निर्वाचन आचारसंहिताको प्रभावकारी कार्यान्वयन र सरोकारवालाहरूको भूमिका विषयक अन्तर्क्रियामा उनले सबै दलहरूसँग छलफल गरेरै आचारसंहिता बनाइएकाले यसको पालना गर्न स्वयं राजनीतिक दलहरू जिम्मेवार हुनुपर्नेमा जोड दिए ।

प्रमुख आयुक्त थपलियाले निर्वाचनका क्रममा सामाजिक सञ्जालमा आचारसंहिता अनुगमन गर्नका लागि आयोगको नेतृत्वमा गृह मन्त्रालय, नेपाल प्रहरी, दूरसञ्चार प्राधिकरणलगायतको टोली बनाइएको बताए ।

उनका अनुसार सामाजिक सञ्जालमा दिइने ‘हेट स्पिच’ को पनि निगरानी भइरहेको छ ।

‘सामाजिक सञ्जालमा निर्वाचनसम्बन्धी गतिविधि गर्दा र अभिव्यक्ति दिँदा सबैले ध्यान दिउँ’, थपलियाको आग्रह थियो ।