सुदूरपश्चिम सरकार पुनर्गठन : यी हुन् मन्त्री र राज्यमन्त्रीमा नियुक्त हुनेहरू (सूचीसहित)

कैलाली । सुदूरपश्चिम प्रदेश सरकार शुक्रवार पुनः पुनर्गठन भएको छ । यस अघि सत्ता गठबन्धनमा भएर पनि सत्ता साझेदारी अवसर नपाएको नेपाली कांग्रेसलाई सरकारमा सहभागी गराउन यस पटक सरकार पुनर्गठन गरिएको हो ।

लामो समय देखी सरकारको नेतृत्व गर्न अग्रसर भएको कांग्रेस अन्ततः कानून मन्त्रालयको नेतृत्व गरेर सरकारमा सहभागी हुने भएको हो । कांग्रेसको तर्फबाट संसदीय दलका नेता डा. रण बहादुर रावल आन्तरिक मामिला तथा कानुन मन्त्रीमा नियुक्त भएका हुन् । रावल एकीकृत समाजवादी कि नेतृ समेत रहेकी पूर्णा जोशीको मन्त्रालय सम्हाल्न पुगेका हुन् ।

रावल सहित कांग्रेसका प्रमुख सचेतक गोविन्द बोहरा र सचेतक टेकबहादुर रैका पनि मन्त्री बन्ने अवसर पाए ।

बोहरा सामाजिक विकास मन्त्री र रैका सामाजिक विकास राज्यमन्त्रीमा नियुक्त भएका हुन् । यी दुवै मन्त्रालय पनि यस अघि एकीकृत समाजवादीले पाएको थियो ।

शुक्रवार एकीकृत समाजवादीको तर्फबाट पनि तीन जनालाई राजीनामा दिन लगाएर थप तीन जनालाई नियुक्त गरिएको छ ।

एकीकृत समाजवादीका तर्फबाट आर्थिक मामिला तथा योजना मन्त्रीमा प्रकाश रावल नियुक्त भएका छन् । उनी यस अघि उद्योग पर्यटन वन तथा वातावरण राज्य मन्त्री थिए । आर्थिक अनियमितताको आरोप लागेपछि उनले राजीनामा दिएका थिए । उनी बाहेक अन्य दुई राज्य मन्त्रीले पहिलो पटक सरकारमा अवसर पाएका हुन् ।

पहिलो पटक अवसर पाउनेमा आर्थिक मामिला तथा योजना राज्य मन्त्रीमा अमर साउद र भौतिक पूर्वाधार तथा योजना राज्य मन्त्रीमा कुलवीर चौधरी रहेका छन् ।

यस अघि आर्थिक राज्य मन्त्रीमा माया तामाङ बोहरा र भौतिक राज्य मन्त्रीमा चुनकुमारी चौधरी रहेका थिए ।