जुम्ला कांग्रेसमा रडाको, सभापतिले निरंकुश शैलीमा तालमेलको निर्णय गरेको आरोप

सुर्खेत । नेपाली कांग्रेस जुम्लाका सभापति कर्णबहादुर शाहीले चैत २२ र २३ गते बसेको जिल्ला कार्यसमितिको वैठकको मर्म र भावनाविपरीत चुनावी तालमेल गर्ने निर्णय गरेको भन्दै नेता कार्यकर्ता आक्रोशित भएका छन् ।

उपसभापति कार्मा बुढा, दीपक शाही, सचिव लक्ष्मण शाही, अर्जुनसिंह कठायत गोल्डेन, सहसचिव नन्दप्रसाद चौलागाई, धनेन्द्र बोहरा, क्षेत्रीय सभापतिहरू लछिमन बोहरा र कालीबहादुर बुढाले विज्ञप्ति निकाल्दै कांग्रेस एक्लै चुनावमा लड्ने कार्यकर्ताले गरेको निर्णयविपरीत सभापति शाहीले मनमौजी गरेको आरोप लगाइएको छ ।

केन्द्रीय समितिले आवश्यकता र औचित्यको आधारमा गठबन्धनमा रहेका दलहरूसँग गठबन्धन गर्न सकिने भनेकोमा जुम्लाका ६० वडा सभापति, ८ पालिका सभापति, २ क्षेत्रीय सभापति साथै कार्यसमितिका सात ७ जना पदाधिकारीसहित ७७ जनाको रायसुझाव अनुसार चैत २२ र २३ मा जिल्ला कार्य समितिको पूर्णबैठकले गठबन्धन नगर्ने भनी सर्वसम्मत निर्णय गरेको विज्ञप्तिमा उल्लेख छ ।

‘उक्त निर्णयको मर्म र भावनाविपरीत सभापती कर्णबहादुर शाहीले पार्टीभित्र आन्तरिक छलफल नगरी एकल रूपमा गठबन्धन दलहरू सँग बैठक बसी जुम्ला जिल्लामा गठबन्धन गर्ने भनी गरिएको निर्णयप्रति हाम्रो गम्भीर आपत्ति र असहमति छ’, चुनावी तालमेलप्रति असन्तुष्ट कांग्रेसी नेताहरूको विज्ञप्तिमा भनिएको छ ।

सभापति शाहीले निरंकुश शैलीमा सहमति गरेको भन्दै विज्ञप्तिका भर्त्सना गरिएको छ ।

विज्ञप्तिमा लेखिएकव छ, ‘जुम्ला जिल्लामा नेपाली काग्रेस आउने स्थानीय तहको निर्वाचनमा एक्ला एक्लै निर्वाचनमा प्रतिस्पर्धा गर्ने कुराको सहर्ष जानकारी गराउँदछौं ।’