स्काउट अप्ठेरोको साथी : ओली (भिडिओ)

काठमाडौं । नेकपा एमालेका अध्यक्ष केपी शर्मा ओलीले प्राकृतिक विपद्मा नेपालमा स्काउटले खेलेको भूमिकाको प्रशंसा गरेका छन् । विश्व स्काउट संगठन एसिया प्रशान्त क्षेत्रले प्रदान गरेको ‘मेधावी स्काउट सुशोभन’ ग्रहण गर्दै उनले स्काउटले नेपालको विपद्मा खेलेको भूमिका उदाहरणीय रहेको बताए ।

‘नेपालमा स्काउटले ७० वर्षदेखि गर्दै आएको भूमिकाको प्रशंसनीय छ,’ उनले भने, ‘कोभिड–१९, भूकम्पलगायतका विपद्मा स्काउटले खेलेको भूमिकाका लागि धन्यवाद दिन चाहन्छु ।’

अध्यक्ष ओलीले विश्वमा स्काउट भनेको अप्ठेरोको साथी हो भन्ने कुरा स्थापित भएको बताए । उनले भने, ‘स्काउट भनेको अप्ठेरोको बेला उद्धारको काम गर्ने, राहत प्रदान गर्ने, निस्वार्थ मानव मित्रको रूपमा विश्वव्यापी स्थापित भएको छ ।’

आफ्नो प्रतिकुलता भएपनि मानव जातीको अनुकुलताका लागि हित र रक्षाका लागि काम गर्ने संस्थाका रूपमा नेपालमा स्काउट स्थापित भएको पनि उनले बताए ।

स्काउट नेपालका ७ वटै प्रदेश र ७ सय ५३ स्थानीय तहमा स्काउट विस्तारित रहेको पनि अध्यक्ष ओलीले बताए ।

पूर्वप्रधानमन्त्री एवं अध्यक्षलाई ओली विश्व स्काउट एसिया प्रशान्त क्षेत्रीय ‘मेधावी स्काउट सुशोभन’बाट सम्मानित गरेको हो । आज एक समारोहकाबीच राष्ट्रपति विद्यादेवी भण्डारीले उनलाई सम्मान गरेकी हुन् ।