एमालेले टुङ्गायो धनगढीका पाँच वडामा सर्वसम्मत वडाध्यक्ष

कैलाली । सुदूरपश्चिम प्रदेशको एक मात्र धनगढी उपमहानगरपालिकामा नेकपा एमालेले पाँच वडामा सर्वसम्मत वडाध्यक्ष टुङ्गाएको छ ।

१९ वटा वडा रहेको धनगढी उपमहानगरपालिकाको वडा नम्बर २, ११, १५, १६ र १७ नम्बर वडामा सर्वसम्मत रूपले वडाध्यक्ष टुङ्गाएको धनगढी नगर सचिव प्रेम महराले जानकारी दिए ।

उनका अनुसार वडा नम्बर २ मा विष्णु पुरी, ११ मा रूप बहादुर कुँवर, १५ मा गोले कुन्जेडा, १६ मा भागिराम चौधरी र १७ मा दीपेन्द्र घर्तिमगर टुङ्गिएको हो । यी बाहेकका अन्य वडाहरूमा दुई वा दुई भन्दा धेरैको नाम वडा कमिटीले नगर कमिटीमा पठाएको छ ।

यी पाँच वडाहरूमा वडाध्यक्ष सहित दुई खुल्ला सदस्य, एक महिला सदस्य र एक दलित महिला सदस्य पनि सर्वसम्मत गरिएको छ ।