ओखलढुंगाको मानेभञ्ज्याङ र चिशंखुगढीमा एमालेले छान्यो अध्यक्षका उम्मेदवार
नेपाल प्रेस
२०७९ वैशाख ४ गते १२:२५
काठमाडौं । ओखलढुंगाको दुई गाउँपालिकामा एमालेले अध्यक्षको उम्मेदवार टुंग्याएको छ । मानेभञ्ज्याङ र चिशंखुगढी गाउँपालिकाबाट प्रमुखमा एक-एक जना सिफारिस गरी पठाइएको हो ।
एमालेले चिशंखुगढीमा जीवनकुमार थापा र मानेभञ्ज्याङमा रुपलाल तामाङलाई अघि सारेको छ ।
तामाङ खेलकुद विकास समितिको अध्यक्षसमेत भइसकेकाले युवमाझ लोकप्रिय छन् । चिशंखुका थापा पनि जनप्रिय नेताका रूपमा परिचय बनाएका छन् ।
पालिका कमिटीले १/१ जनाको मात्रै नाम सिफारिस गरेकोले यहाँ यीनै दुईजना उम्मेदवार बन्ने पक्का छ । तर, चिशंखुगढी प्रमुखमा दाबी गर्दै आफ्नो नाम पनि सिफारिस गर्न जिल्ला कमिटीका उपसचिव अशोक थापाले माग गरेका छन् ।
चिशंखुको उपप्रमुखमा चम्पा राई, सुस्मिका राई र लक्ष्मी कार्कीको नाम सिफारिस गरिएको छ ।
जिल्लाका ८ वटै स्थानीय तहबाट उम्मेदवार सिफारिस भइसकेको एमाले ओखलढुंगाका अध्यक्ष शंकर कटुवालले बताए ।
‘कतिपय ठाउँबाट ६/७ जनाको नाम आएको छ । फेरि छलफल गरेर पठान भनेका छौं । धेरैजनाको आउँदा प्रदेशमा पठाउन समस्या भएको छ’, कटुवालले भने ।
जिल्लाका ७५ वडामध्ये ३७ वडामा सर्वसम्मत अध्यक्षका उम्मेदवार छानिएको जिल्ला सचिव कमल न्यौपानेले बताए ।
नेपाल प्रेस
प्रकाशित: २०७९ वैशाख ४ गते १२:२५
प्रतिक्रिया
सम्बन्धित खवर
