रुकुम पूर्वमा पनि गठबन्धन नहुने संकेत

रुपन्देही । बाँके, रोल्पा, प्युठान, रुपन्देहीमा खटपट भएको सत्तारुढ दलको चुनावी गठबन्धन रुकुम पूर्वमा पनि पुगेको छ ।

भागबन्डाका लागि सत्ता गठबन्धनमा रहेका दलका बीचमा पटक–पटक सहमतिका लागि बैठक बसे पनि टुंगो लाग्न नसकेको हो ।

गठबन्धन गर्ने विषयमा छलफल भए पनि दलहरूले आ–आफ्नो दाबी कायमै राखेपछि जिल्ला स्तरबाट सबै पालिकामा गर्न खोजिएको गठबन्धन प्रयास सफल हुन नसकेको हो र अब जिल्ला संयन्त्रले गठबन्धनको टुंगो लगाउने सम्भावना सकिएको एक नेताले बताए ।

माओवादीको बलियो क्षेत्र मानिएको यो जिल्लामा नेपाली कांग्रेसले गठबन्धनमा जाँदा समान हैसियत खोजेपछि माओवादी केन्द्रले अस्वीकार गरेपछि यस्तो अवस्था आएको हो ।

त्यस्तै नेकपा एकीकृत समाजवादी, जसपा र जनमोर्चाले पनि आफ्नो अस्तित्वसहितको सम्मानजनक भागबन्डा हुनुपर्ने बैठकमा राखिरहेका छन् ।

यद्यपि दलहरूले पालिका र वडामा गठबन्धन गर्न चाहेमा उनीहरूले नै निर्णय गर्ने अधिकार भने दिएको र पालिका तथा वडालाई तालमेलका लागि जिम्मा दिइएको नेपाली कांग्रेस जिल्ला उपसभापति भीमबहादुर खड्काले बताए ।

वडामा मात्रै वा कुनै एक पालिकामा गठबन्धन हुन सकेको खण्डमा त्यतिमा मात्रै भए पनि गठबन्धन गर्ने कुरामा सबै दल सहमत भएको उनले बताए ।

तीन पालिका रहेको यो जिल्लामा गत स्थानीय तहको निर्वाचनमा तीनै पालिका माओवादीले जितेको थियो भने दुई स्थानमा मात्रै कांग्रेस प्रतिस्पर्धामा थियो ।

यस्तो थियो २०७४ काे अवस्था

१. पुथा उत्तरगंगा गाउँपालिका, माओवादी (२५५१), एमाले (१२३६), कांग्रेस (१११४)

२. भुमे गाउँपालिका, माओवादी (३४८२), कांग्रेस (१७१४), एमाले (४४२)

३. सिस्ने गाउँपालिका, माओवादी (३२९६), कांग्रेस (२४७१), एमाले (४६)