बालुवाटारबाट बाहिरिँदै चिरिबाबुले भने – ललितपुरमा मेयर र उपमेयरसहित २० वडाध्यक्ष पाउँछौं

काठमाडौं । ललितपुर महानगरपालिकामा गठबन्धन मान्न आफूहरू तयार रहेको ललितपुर महानगरपालिकाका प्रमुख चिरिबाबु महर्जनले बताएका छन् ।

प्रधानमन्त्री शेरबहादुर देउवालाई भेट्न बालुवाटार पुगेका उनले सञ्चारकर्मीहरूसँग संक्षिप्त कुराकानी गर्दै पार्टी केन्द्रको निर्णय मान्न आफूहरू तयार रहेको बताएका हुन् ।

‘केन्द्रको निर्णय हो, मान्छौं, मान्न तयार छौं’, उनले भने, ‘अघिल्लो निर्वाचनमा मेयर–उपमेयर हामीले जितेका हाैं, हामी नै राख्छौं । वडाहरू मिलाएर लैजान्छौं ।’

१८-१९ वडाध्यक्षमा पनि कांग्रेसको दाबी गरेको उनले जानकारी दिए । प्रमुख पदमा नेपाली कांग्रेसबाट आफ्नो टिकटको दाबी रहेको बताउँदै उनले आफूले टिकट पाउने सम्भावना पनि प्रवल रहेको बताए ।

प्रधानमन्त्री भेट्न टिकटका लागि भने नआएको उनकाे भनाइ छ । सञ्चारकर्मीहरूको जिज्ञासामा उनले भने, ‘हैन, अर्कै मुद्दामा छलफल गर्न आएका हौं । टिकटका लागि होइन ।’