कास्की कांग्रेसको सर्त- गठबन्धनका मेयर उम्मेदवारले रुख चिन्हबाट चुनाव लड्नुपर्छ नत्र हाम्रो बहिस्कार हुन्छ

पोखरा । नेपाली कांग्रेसले पोखरा महानगरपालिकाको मेयर नेकपा एसले पाउने हो भने रुख चिन्ह लिएर चुनाव लड्नुपर्ने सर्त राखेको छ ।

कांग्रेस कास्की जिल्ला सचिव भानु ढकालले रुख चिन्ह लिएर नलडे नेकपा एसका उम्मेदवारलाई बहिस्कार गर्ने बताएका छन् ।

सत्ता गठबन्धनको शीर्ष बैठकमा पोखरा नेकपा एसलाई दिने सहमति भइसकेपछि कांग्रेसले रुख चिन्ह नलिए मेयर उम्मेदवारलाई बहिस्कार गर्ने चेतावनी ढकालले दिए ।

नेपाल प्रेससँग कुरा गर्दै ढकालले गठबन्धनको बैठकमा आफूहरूले यो कुरा राखेको जानकारी दिए ।

ढकालले भने– पोखराको मेयर गठबन्धन दलले पाउने हो भने हामीले केन्द्रको निर्णय मान्नै पर्छ तर रुख चिन्हबाट नलड्ने हो भने हामी चुनाव प्रचार, बैठक कतै पनि सहभागी हुन सक्दैनौँ । कांग्रेसको ६० हजार भोट अरू चिन्हमा खन्याउन सम्भव छैन । यो कुरा माधव नेपालले बुझ्नुपर्छ ।

पोखरा महानगरपालिकामा नेकपा एसको बढीमा १८ सय भोट पनि नरहेको भन्दै ढकालले कांग्रेसले रुखबाहेक अन्यत्र भोट हाल्न सम्भव नहुने कुरालाई गठबन्धनका दलले बुझिदिनुपर्ने बताए ।