एमाले कर्णालीले मेरिट लिस्टका आधारमा टिकट बाँड्ने

सुर्खेत । नेकपा एमाले कर्णाली प्रदेश कमिटीको टिकट निर्णय समितिको बैठक बिहीबार बस्दैछ । एमाले प्रदेश कमिटी सचिव कमल शाहीका अनुसार बिहीबार बस्ने बैठकले जिल्लाबाट पालिकाका प्रमुख तथा उपप्रमुख र अध्यक्ष तथा उपाध्यक्षको टिकट वितरणको निर्णय गर्ने छ ।

‘करिब ७९ पालिकामध्ये ८० प्रतिशत पालिकाबाट उम्मेदवारहरुको नामावली हामीकहाँ आइसकेको छ । त्यसमध्ये २५ प्रतिशत सर्वसम्मत उम्मेदवार छनाेट भइसकेका छन् । केही पालिकामा खुला मतदानबाट उम्मेदवार चयन भएर आएका छन्’, उनले भने, ‘अधिकांश पालिकाबाट ध्वनि मतका आधारमा सिफारिस भएर आएका छन् । आजको बैठकमा छलफल गर्छौं र भोलिसम्म टिकट वितरण गर्छौं ।’

सचिव शाहीले आन्तरिक मतदान भएका स्थानहरुका हकमा टिकट वितरणमा कुनै पनि समस्या नभएको बताए । ‘आम कार्यकर्ताले गरेको मतदानमा जो पहिलो भएको हो, त्यसैले टिकट पाउँछ । यसमा कुनै समस्या छैन अर्थात् मेरिट लिस्टकै आधारमा टिकट वितरण गर्छौं’, उनले भने, ‘त्यसरी आएका उम्मेदवारहरुमा पनि कुनै मुद्दा नभएको हुनुपर्छ ।’