सत्ता गठबन्धनले सातै प्रदेशमा संयुक्त चुनावी सभा गर्ने

काठमाडौं । सत्तारुढ पाँच दलीय गठबन्धनले सातै प्रदेशमा संयुक्त चुनावी सभा गर्ने भएको छ ।

गठबन्धनको तयारी एवं अनुगमन समितिको बिहीबार बसेको बैठकले बैशाख १८ देखि २२ गतेसम्म सातै प्रदेशमा सभा गर्ने निर्णय गरेको हो ।

चुनावी सभालाई नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाका शीर्ष नेताले सम्बोधन गर्नेछन् ।

गठबन्धनका संयोजक एवं कांग्रेस वरिष्ठ नेता रामचन्द्र पौडेलसहित ६ जना शीर्ष नेताले सम्बोधन गर्नेगरी चुनावी सभाको तालिका सार्वजनिक गरिएको छ । जसअनुसार बैशाख १८ गते धनगढी र सुर्खेत, बैशाख १९ गते बुटवल र पोखरा, बैशाख २० गते विराटनगर र जनकपुर तथा बैशाख २२ गते काठमाडौंमा संयुक्त चुनावी सभा हुनेछ ।