एमाले वैठक: स्थानीयस्तरमा कांग्रेस र माओवादीसँग पनि तालमेल हुन सक्ने

काठमाडौं । नेकपा एमालेले स्थानीय तहको चुनावमा सत्तारुढ गठवन्धनभित्रका दलहरुसँग पनि तालमेल हुन सक्ने जनाएको छ । आज भएको केन्द्रीय सचिवालय बैठकपछि पत्रकारहरुसँग कुरा गर्दै पार्टीका प्रचार विभाग प्रमुख पृथ्वी सुब्बा गुरुङले महानगर र उपमहानगरमा कांग्रेस र माओवादीसँग पनि सहकार्यको ढोका खुला रहेको बताए ।

उनले भने, ‘सकारात्मक शक्ति र पार्टीहरुसँग महानगर र उपमहानगरमा पनि हाम्रो सहकार्य हुन्छ । १२ गतेसम्ममा सबै टुंगो लगाउँछौं ।’

गुरुङका अनुसार एमालेले समाजवादी पार्टी, लोकतान्त्रिक समाजवादी पार्टी, राष्ट्रिय प्रजातन्त्र पार्टीसँग पनि सहकार्य गर्न सक्ने छ ।

आज बसेको बैठकमा सात वटै प्रदेश कमिटीले विभिन्न महानगर र उपमहानगरका लागि गरेका उम्मेदवारी सिफारिसमाथि छलफल भएको थियो । छलफलले कुनै पनि ठोस निर्णय लिएको छैन । पर्सी १० गते बस्ने बैठकले पार्टीको तर्फबाट ६ महानगर र ११ वटा उपमहानगरका प्रमुख तथा उपप्रमुखको उम्मेदवारी फाइनल गर्ने गुरुङले जानकारी दिए ।

वीरगञ्ज, चितवन र ललितपुर महानगरबाट भने १-१ जनाको मात्रै नाम सिफारिस भएकाले उनीहरुको तीनैजनाले टिकट पाउने निश्चित रहेको उनको भनाइ छ ।