एमालेका बाबुलाल यादवद्धारा पार्टी परित्याग

रुपन्देही । नेकपा (एमाले)का लुम्बिनी प्रदेश कमिटी सदस्य बाबुलाल यादवले पार्टी छाडेका छन् । शनिबार भैरहवामा पत्रकार सम्मेलन गरी नेता यादवले एमालेको साधारण सदस्यसमेत नरहने गरी पार्टी परित्याग गरेको जानकारी गराएका छन् ।

स्थानीय तहको निर्वाचनमा सम्मरीमाई गाउँपालिका अध्यक्षको उम्मेदवारको आकांक्षी भए पनि कुनै पनि छलफल नगराइएपछि असन्तुष्ट रहेका यादवले एमालेको सिद्वान्त, विचार मन परेर २०५४ सालदेखि नै पार्टीमा लागेको तर केही नेताहरुको कारण आफूले पार्टी छोडेको बताए ।

पार्टी विधि, विचार र सिद्वान्त अनुसार नचलेको उनको भनाइ थियो । केही नेताहरुका कारण अहिलेको अवस्थामा आफूलाई अत्यन्तै पीडाको महसुस भएको उनले बताए ।

आफूलाई रुपन्देही क्षेत्र नम्बर ४ (मर्चवार क्षेत्र)को इञ्चार्ज बनाइए पनि नेतृत्वले मर्चवारको विषयमा आफूसँग कुनै छलफल नगरेको उनले गुनासो गरे ।