झापाका दुई नगरपालिकामा एमालेले उठायो मेयरमा महिला उम्मेदवार

झापा । नेकपा एमालेका अध्यक्ष केपी शर्मा ओलीको गृह जिल्ला झापाका १५ स्थानीय तहमध्ये मुख्य दुई नगरपालिकामा एमालेले महिलालाई मेयरको उम्मेदवार बनाएको छ ।

एमालेले दमकको मेयरमा गीता अधिकारी र बिर्तामोडको मेयरमा पवित्रा महतरा प्रसाईँलाई उम्मेदवार बनाउने निर्णय गरेको प्रदेश १ का इन्चार्ज देवराज घिमिरेले बताए ।

अधिकारी र महतरा हाल उपमेयर छन् । महिलाको प्रतिनिधित्व बढाउन हालका दुई उपमेयरलाई मेयरमा उम्मेदवार बनाइएको उनले बताए । दमक एमाले अध्यक्ष ओलीको गृह नगर हो ।

गीता अधिकारी एमाले केन्द्रीय सदस्य समेत हुन् । प्राध्यापन पेसाबाट राजनीतिमा सक्रिय भएकी अधिकारी एमाले बाहिरसमेत लोकप्रिय रहेकाले उनलाई मेयरमा अघि सारिएको बताइएको छ ।