ललितपुरका एमाले उम्मेदवारले भने- स्यालको बथानले सिंहको शिकार गर्न सक्दैन (तस्बिरहरू)
![](https://www.nepalpress.com/wp-content/uploads/2022/04/uml-lalitpur-mayor-1.jpg)
ललितपुर । नेकपा एमालेबाट ललितपुर महानगरपालिकाको मेयर उम्मेदवार हरिकृष्ण व्यञ्जनकारले आफू विरुद्ध जति दलको गठबन्धन भए पनि जनताको साथ पाएर जित्ने दाबी गरेका छन् ।
ललितपुर महानगरको निर्वाचन कार्यालयमा उम्मेदवारी दर्ता गराउँदै व्यञ्जनकारले अघिल्लो चुनावमा मतगणनामा धाँधली गरेर थोरै मतले हराइएको भनी यस पटक जनताले न्याय दिने बताए ।
उनले एमालेविरुद्धको गठबन्धनलाई सिंहकाविरुद्ध स्यालहरूको भीड भन्दै स्याल जति मिले पनि सिंहको शिकार गर्न नसक्ने बताए । उम्मेदवारी दर्तापछि उपमेयरकी उम्मेदवार मन्जली शाक्यले गठबन्धनलाई परास्त गर्न ललितपुरका जनताको साथ रहेको बताइन् ।
शाक्य अघिल्लो चुनावमा माओवादीबाट उपमेयरको उम्मेदवार बनेर अन्तिममा फिर्ता भएकी थिइन् ।अहिले उनी महानगरपालिका कमिटी एमालेको अध्यक्ष छिन् ।
उम्मेदवारी दर्ताअघि मेयर र उपमेयरका उम्मेदवारले शताब्दी पुरुष सत्यमोहन जोशी र ललितपुरका ज्येष्ठ कम्युनिस्ट सिद्धिलाल सिंह तथा स्नेतहलता श्रेष्ठलाई भेटेर आशीर्वाद लिएका थिए ।
उनीहरू बाजागाजा र जुलुससहित उम्मेदवारी दर्ता गर्न पुगेका थिए ।