केकी र वर्षा : सुटुक्क बिहेपछि किस्ता-किस्तामा फोटो सार्वजनिक गर्दै
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/04/keki-barsha.jpg)
काठमाडौं । नायिकाद्वय केकी अधिकारी र वर्षा शिवाकोटीले एक दिन अघिपछि उस्तै शैलीमा विवाह गरे । कुनै हल्लाखल्लाबिना नजिकका साथीभाईलाई पनि थाहा नदिई उनीहरुले सट्याकसुटुक लगनगाँठो कसेका थिए ।
विवाहपछि उनीहरु सामाजिक सञ्जालमा किस्ता-किस्तामा तस्वीरहरु सेयर गरिरहेका छन् । विवाहमा कुनै पनि मिडियालाई पहुँच नदिएका र आगन्तुकलाई मोबाइलबाट फोटो खिच्नसमेत निषेध गरेका थिए उनीहरु दुवैले । केकीले विवाहको अघिल्लो दिन मेहेन्दी लगाएको फोटो भने भाइरल भएको थियो ।
विवाहपछि दुवै नायिकाले आफ्नो अफिसियल फोटोग्राफरहरुले खिचेको फोटो र भिडिओ लगातार सार्वजनिक गरिरहेका छन् । दुवैका तस्वीरहरुमा पर्याप्त लाइकर कमेन्टहरु पनि आइरहेका छन् ।
यी दुई नायिकाको विवाहमा अरु पनि समानता देखिएका छन् । उनीहरु दुवैले विवाहमा भारतीय संस्कृतिलाई महत्व दिए । हल्दी र मेहेन्दी समारोह नेपाली कल्चर होइनन् । यस्तै, विवाहमा उनीहरुको पहिरन, गहना र श्रृंगारले पनि भारतीय बेहुलीको झल्को आएको थियो । नेपाली चलचित्रलाई माया गरौं भनेर नथाक्ने कलाकारहरुले विवाहमा भारतीय संस्कृतिलाई महत्व दिएको भनेर पनि कतिपयले सामाजिक सञ्जालमा आलोचना गरेका छन् ।
केकी र वर्षा दुवै शालिन छविका नायिका हुन् । उनीहरुले विवाहमा धेरै मानिसहरु बोलाएर ठूलो तडकभडक देखाउन चाहेनन् । यद्यपि, वर्षाको भारीभर्कम गहनाले भने चर्चा बटुलेको छ ।
विवाहपछि वर्षा हनिमुनका लागि पोखरातिर लागिसकेकी छन् । केकीको भने हनिमुन योजना सार्वजनिक भएको छैन ।