भरतपुरमा विजय सुवेदीको अभियान शुरु, मेघौली पुगेर गरे यस्तो प्रतिबद्धता

वैशाख । नेकपा एमालेको तर्फबाट भतरपुर महानगरको उम्मेदवार बनेका विजय सुवेदीले चितवनको मेघौलीलाई प्राकृतिक सौन्दर्यसहितको नयाँ पर्यटकीय केन्द्रको रुपमा विकास गर्ने प्रतिवद्धता जनाएका छन् ।

घरदैलो र चुनावी सभाका क्रममा उम्मेदवार सुवेदीले पर्यटकीय केन्द्रको सम्भावना बोकेर पनि आवश्यक पूर्वाधार नहुँदा मेघौली पछाडि परेको बताए ।

उनले घरदैलो अभियानको सुरुवात गर्दै महानगरका २७ र २८ नम्बरका मतदातासँग भेटघाट गरे ।

नारायणी र राप्ती नदीको तटबन्ध गरी आवास, सडक, हरियाली किनार, जलक्रिडा र अन्य यातायातको विकास गर्ने पनि सुवेदीले बताए ।

बीसहजारी ताल र सीतामाइदेखि मेघौली गोलाघाटसम्मको राप्ती करिडोरलाई पर्यटकीय गन्तव्यको रुपमा विकास गर्ने आफ्नो योजना रहेको पनि घरदैलोको क्रममा उनले बताए ।

स्वच्छ, सुन्दर र समृद्ध भरतपुर निर्माणका लागि महानगरबासीकै साथ र सहयोगमा कार्यथालनी गरिने पनि उनले बताए ।

मेघौली विमानस्थलको स्तरोन्नती गरी यसको सञ्चालन गर्न सकिए यस क्षेत्रका जनताको आर्थिकस्तर समेत वृद्धि हुने हुँदा यस कामका लागि आफू प्रतिबद्ध रहेको सुवेदीले बताए ।

बागमती प्रदेश सभाका सदस्य रहेका सुवेदीलाई एमालेले भरतपुरको मेयरमा उम्मेदवारमा सिफारिस गरेसँगै उनले प्रदेश सभा सदस्यबाट राजीनामा दिएका थिए ।

एमालेले भरतपुरमा राप्रपासँग चुनावी तालमेल गरेकाले घरदैलोमा राप्रपाका तर्फबाट उपमेयरकी उम्मेदवार हिमला गुरुङको पनि सहभागिता थियो । एमालेले राप्रपालाई उपमेयरसहित दुई वटा वडामा सहयोग गर्ने भएको छ ।

बाँकी २७ वटा वडामा एमालेले आफ्ना उम्मेदवार उठाएको छ । भरतपुरको २७ नम्बर वडामा ६०३८ र २८ नम्बर वडामा ४८२१ मतदाता छन् । महानगरमा भने एक लाख ८५ हजार ७५२ मतदाता छन् ।