बेन्जेमाको गोलमा रियललाई सफलता

एजेन्सी । फ्रान्सेली स्ट्राइकर करिम बेन्जेमाले २ गोल गरेपछि एथ्लेटिको विल्बाओलाई ३–१ गोलले पराजित गरी रियल मड्रिड ला लिगाको तेस्रो स्थानमा पुगेको छ ।

ला लिगामा शीर्ष स्थानमा रहेका तीन टोलीहरुबीच समान २६ अंक छ । तर गोलअन्तरमा रियल मड्रिड टिम रियल सोसिडाड र एट्लेटिको मड्रिडभन्दा पछि परेको छ ।

बिल्वाओका राउल गार्सिया खेलको १३ औं मिनेटभित्रै दुई पहेँलो कार्ड पाएर मैदान छाटेका थिए । दुवैपल्ट उनले रियलका टोनी क्रुजलाई फल गरेका थिए । उनै क्रुजले गोल गरी पहिलो हाफको इन्ज्यूरी समयमा रियललाई अग्रता दिलाएका थिए ।

दोस्रो हाफ सुरु भएलगत्तै एन्डर कापाले बिल्वाओका लागि बराबरी गोल फर्काए । उनको पहिलो प्रहार रियलका गोलरक्षकले पन्ज गरेपछि अर्को प्रयासमा गोल भएको हो ।

त्यसपछि बेन्जेमाले २ गोल गरेका हुन् । उनले ७४ औं मिनेटमा हेडमार्फत गोल गरी अग्रता दिलाए भने इन्ज्यूरी समयमा गोल गरी ३–१ को जित निश्चित गरे ।