भोजपुरमा एमालेले बनायो २१ सय सदस्यीय ‘साइबर फोर्स’ (भिडिओ)

भोजपुर । चुनावी प्रचारप्रसारलाई तीब्र पार्न नेकपा एमाले भोजपुरले ‘साइबर फोर्स’ घोषणा गरेको छ ।

आज सदरमुकाममा आयोजित एक कार्यक्रम बीच उक्त फोर्स गठन गरेर घोषणा गरिएको हो । एमालेले जिल्लाका ९ वटै स्थानीय तहका ८१ वडाका विशेषगरी सामाजिक सञ्जालमा सक्रिय तथा सूचना प्रविधिमा दख्खल राख्ने युवालाई समेटेर २१ सय सदस्य रहेको साइबर फोर्स बनाएको कार्यक्रममा जानकारी गराइयो ।

निर्वाचनमा पार्टीबाट अघि सारिएका उम्मेदवारको चुनावी प्रतिबद्धता मतदातामाझ पुर्‍याउन प्रविधिको प्रयोगमा जोड दिँदै प्रभावकारीरूपमा प्रचारप्रसारका लागि ‘साइबर फोर्स’ गठन गरिएको एमाले भोजपुरका अध्यक्ष शरणकुमार राईले जानकारी दिए ।

‘हाम्रा उम्मेदवारहरूका एजेण्डा हरेक घरमा पुर्‍याउन, एमालेमाथि गठबन्धनको प्रहारको प्रतिवाद गर्न हामीले यो दस्ता तयार पारेका हौं’, राईले भने ।

घोषणा कार्यक्रममा जिल्ला इन्चार्ज केन्द्रीय सदस्य हरिबहादुर राई, उपाध्यक्ष मक्कर खड्का, युवा नेता विमल रणपहेँलीलगायत सहभागी थिए ।