आफ्ना स्वतन्त्र उम्मेदवारलाई मतदान गर्न विप्लवको अपिल

काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ आफ्नो पार्टीको समर्थनप्राप्त स्वतन्त्र उम्मेदवारहरूलाई मतदान गर्न आह्वान गरेका छन् ।

आज एक अपिल सार्वजनिक गर्दै उनले ‘देशभक्त एवं जनवादी स्वतन्त्र उम्मेदवारहरुलाई मतदान गर्न’ अपिल गरेका हुन् ।

सार्वजनिक भएको अपिलमा नेकपाले स्थानीय चुनावमा एमसीसी एवं राष्ट्रघातविरोधी देशभक्त, जनवादी प्रतिनिधिहरूलाई सहभागी गराउने र सहयोग गर्ने नीति र निर्णय पारित गरेको उल्लेख गरेको छ ।

अपिलमा भनिएको छ, ‘यही नीति अनुसार २०७९ वैसाख ३० गते हुने चुनावमा पुतली चुनाव चिन्ह लिएर उम्मेदवार हुनु भएका साथै अन्य कैयौं स्थानमा अन्य चिन्ह जस्तो कि लठ्ठी, हाँस, धरहरा आदि लिएर उठेका देशभक्त, जनवादी स्वतन्त्र उम्मेदवारहरूलाई सहयोग र समर्थन गर्ने नीति लिएको जानकारी गराउँदछौं ।’

यद्यपि अहिलेको संसदीय सत्ता र व्यवस्थाभित्रका कुनै पनि इकाइ र तहबाट राष्ट्र र जनताका पक्षमा आमूल परिवर्तन गर्न सम्भव नभएको कुरामा प्रष्ट रहेको विप्लवको जिकिर छ ।

‘देशको स्वाधीनता एवं जनताको पूर्णअधिकारका लागि वैज्ञानिक समाजवादी सत्ता अपरिहार्य छ,’ अपिलमा भनिएको छ । तर, स्थानीय चुनावलाई राष्ट्र र जनताका पक्षमा संघर्ष गर्ने कार्यनीतिक मोर्चाका रुपमा ग्रहण गरेको विप्लवले जनाएका छन् ।