कांग्रेसका ३० हजार ६२८ जना चुनावी मैदानमा

काठमाडौं । आसन्न स्थानीय तह निर्वाचनमा नेपाली कांग्रेसबाट ३० हजार ६ सय २८ जना आधिकारिक उम्मेदवार रहेको कांग्रेसले जनाएको छ ।
आज पार्टी कार्यालय सानेपामा आयोजित पत्रकार सम्मेलनका क्रममा प्रवक्ता डा. प्रकाशशरण महतले यो जानकारी दिएका हुन् ।

देशभरका ७ सय ५३ स्थानीय तहका ३५ हजार दुई सय २१ पदका लागि वैशाख ३० गते निर्वाचन हुँदैछ । त्यसमा कांग्रेसका तर्फबाट देशरभका ६ महानगरपालिका, ११ उपमहानगरपालिका र २ सय ७६ नगरपालिका गरी २ सय ९३ जना नगरपालिकाका मेयरमध्ये २ सय ६५ जना उम्मेदवार रहेको कांग्रेसले जनाएको छ । यस्तै २ सय ९३ उपमेयर पदमध्ये एकसय ९४ जना उपमेयर उम्मेदवारी परेको छ ।

यस्तै ४ सय ६० गाउँपालिका अध्यक्ष पदमध्ये ३ सय ७२ मा कांग्रेसको उम्मेदवारी पर्दा ३ सय ४० गाउँपालिका उपाध्यक्ष पदमा उम्मेदवारी कायम रहेको प्रवक्ता महतले बताए ।

यस्तै देशभरका ६ हजार ७ सय ४३ वडाध्यक्ष पदमध्ये ६ हजार ४३ मा, ६ हजार ७ सय ४३ कै संख्यामा हुने क्रमसः महिला वडासदस्य पदमा ५ हजार ९ सय ३८, दलित महिला वडासदस्यमा ५ हजार ६ सय ९१ जना उम्मेदवारी कायम भएको कांग्रेसले जनायो ।

यस्तै १३ हजार ४ सय ८६ को संख्यामा हुने अन्य वडासदस्य पदमा ११ हजार ७ सय ८८ जना उम्मेदवार कायम भएका छन् ।