आचारसंहिता उल्लङ्घन गर्ने माओवादीसहित तीन पार्टीलाई निर्वाचन आयोगले गरायो सचेत

काठमाडौं । निर्वाचन आयोगले आगामी वैशाख ३० गतेका लागि तय भएको स्थानीय तहको निर्वाचनमा आचारसंहिता उल्लङ्घन गर्ने सत्तारुढ दल नेकपा (माओवादी केन्द्र) सहित तीन राजनीतिक दललाई सचेत गराएको छ ।

नेकपा (माओवादी केन्द्र), नेपाल कम्युनिष्ट पार्टी (एकीकृत समाजवादी) र राष्ट्रिय प्रजातन्त्र पार्टीलाई आयोगले चित्तबुझ्दो जवाफ माग गरे लगत्तै जवाफ प्राप्त भइसकेपछि सम्बन्धित दललाई सचेत गराएको जनाएको हो ।

आयोगले अबदेखि निर्वाचन आचारसंहिता विपरीतका कार्य नगर्न नगराउन आयोगले निर्देशन दिँदै सचेत गराएको सोमबार आयोगमा आयोजित नियमित पत्रकार सम्मेलनमा जानकारी गराइएको हो ।

यी तीन दलले निर्वाचन आयोग ऐन, २०७३ को दफा २३, निर्वाचन (कसुर तथा सजाय) ऐन, २०७३ को दफा २४ र निर्वाचन आयोग ऐन, २०७३ को दफा २२ विपरीत कार्य गरेको देखिएकाले सचेत गराइएको आयोगका सहायक प्रवक्तासमेत रहेका उपसचिव सूर्यप्रसाद अर्यालले जानकारी दिए ।

यस्तै निर्वाचन आयोगले तोकेकोभन्दा बढी खर्च भएको, निर्वाचनमा खर्चको गलत विवरण बुझाएको भन्ने अभिव्यक्ति दिएका गण्डकी प्रदेशका सभामुख नेत्रनाथ अधिकारीलाई पनि आचारसंहिता कार्यान्वयनप्रति सचेत गराएको छ ।