बालेनलाई केशव स्थापितको प्रश्न : र्‍याप भन्दैमा मनपरी बोल्न पाइन्छ ?

काठमाडौं । काठमाडौं महानगरपालिकामा एमालेका मेयर उम्मेदवार केशव स्थापितले स्वतन्त्र उम्मेदवार बालेन शाहमाथि आफ्नो परिचय लुकाएको आरोप दोहोर्‍याएका छन् । बालेनले गाएका र्‍यापलाई लिएर पनि उनले प्रश्न उठाए ।

काठमाडौंमा आयोजित मतदातासँग अन्तरक्रिया कार्यक्रममा बोल्दै स्थापितले बालेनको र्‍यापले महिला हिंसा गरेको बताए ।

उनले भने, ‘ र्‍याप भन्दैमा जे पनि गर्न पाइन्छ ? उनको र्‍यापमा महिलामाथि के के बोलेको छ हेर्नुस् त ? हुनसम्मको अपराध गरेपछि र्‍याप भनेर छोपिन्छ ?’

स्थापितले नयाँ युवा राजनीतिमा आउँदा आफूले स्वागत गर्ने बताए । तर, आफ्नो परिचय लुकाउन नहुने उनको भनाइ छ ।

‘आफ्नो परिचय नखुलाईकन भोट माग्न पाइन्छ ?’ बालेनलाई प्रश्न गरे ।
बालेनले आफू विरुद्ध सामाजिक सञ्जालमा दुष्प्रचार गरेको आरोपसमेत स्थापितले लगाए ।

‘उसको शरीरमा मेरो टाउको जोडेर भ्रम फैलाउने काम गरिरहेका रहेछन्,’ उनले सुनाए, ‘मैले हातमा लट्ठी बोकेको तस्बिर बनाएर लौरोमा भोट हालौँ भनेर ठग काम गरिरहेका छन् । मैले पनि यसै गरी बालेनको फोटो राखेर लालटिनमा भोट हालौँ भन्दै प्रचार गरेँ भने उसलाई एक भोट पनि आउँदैन ।’