म्यानमार कू : चीनको विरोधपछि राष्ट्रसंघले विज्ञप्ति निकाल्न सकेन

काठमाडौं । चीनले विरोध जनाएपछि राष्ट्रसंघ म्यानमारको सैन्य ‘कू’ बारेको विज्ञप्ति प्रकाशन गर्न विफल भएको छ । बीबीसीका अनुसार सुरक्षा परिषद्मार्फत राष्ट्रसंघ विज्ञप्ती प्रकाशनको तयारीमा थियो ।

लोकतन्त्रवादी नेतृ आङसाङ सुकीसहित दर्जनौं सांसदलाई नियन्त्रणमा लिँदै म्यानमार सैनिकले सोमबार शासनसत्ता आफ्नो नियन्त्रणमा लिएको थियो । सेनाले मन्त्रिपरिषद्भन्दा बढी अधिकार भएको सुप्रिम काउन्सिल पनि गठन गरेको छ ।

म्यानमारको मुख्य सहर याङ्गुनमा नागरिक अधिकार खुम्च्याउने गरि कर्फ्यु घोषणा गरिएको छ । चीनले सहयोग नगरेपछि मंगलबार बसेको राष्ट्रसंघको सुरक्षा परिषद्को बैठकले विज्ञप्ती निकाल्न सकेन ।

राष्ट्रसंघको संयुक्त वक्तव्यमा आउनको लागि सुरक्षा परिषद्को स्थायी सदस्यको रुपमा भिटो पावर रहेको चीनको समर्थन जरुरी हुन्छ । बैठकअघि म्यानमारका लागि राष्ट्रसंघका विशेष दूत क्रिस्टिन स्क्यानरले कूको विरोध गरेका थिए ।