टुप्पोमा पुगेपछि धन्य भएँ जस्तो लाग्यो, त्यहाँ पुग्दा रोएँ र फर्किँदा पनि रोएँ : राजु लामा

काठमाडाैं । नेपालका चर्चित गायक तथा गीतकार राजु लामा सगरमाथाको सफल आरोहण गरेर फर्किसकेका छन् । उनी फर्किँदा उनलाई एयरपाेर्टमा पञ्चेबाजासहित भव्य स्वागत गरिएको थियो । उनले सगरमाथाको आरोहणमात्र नभई ७९०० मिटरमा पुगेर एकल कन्सर्टसमेत गरेर आएका छन् ।

उनी भन्छन, ‘सक्दिनँ कि भन्ने डर थियो तर भगवानको कृपाले सफल भए । चुचुरोमा पुग्दा ४ बजेर ५७ मिनेट गएको थियो । त्यहाँ पुगेर आधा घण्टा बसेँ । टुप्पोमा पुगेपछि धन्य भए जस्तो महसुस भयो । अलिक भावनात्मक पनि भए । आँसु खस्यो । म त्यहाँ पुग्दा रोएँ र फर्किँदा पनि रोएँ ।’

विशेष गरेर युवाहरुलाई प्रोत्साहन होस् र जलवायु परिवर्तनले आम जनजीवनमा परेको असरबारे सबैमाझ सन्देश पुगोस् भन्ने नै आफ्नो मुख्य लक्ष्य भएको उनले बताए । गायक लामाले अघिल्लो वर्ष पनि लोबुचे शिखर चढेका थिए । सगरमाथाको आरोहण भने यो उनको पहिलो पटक हो ।