सुन्दरी प्रतियोगिताका आयोजकमाथि यौनशोषणको आरोपबारे अनुसन्धान गर्दै प्रहरी, युवतीसँग सम्पर्क प्रयास

काठमाडौं । ८ वर्षअघि आयोजित एक सुन्दरी प्रतियोगिताका आयोजकले आफूलाई बलात्कार गरेको भनी एक युवतीले सुनाएको घटनालाई प्रहरीले अनुसन्धान सुरु गरेको छ ।

प्रहरीको महिला सेल, उपत्यका प्रहरी अनुसन्धान कार्यालय, काठमाडौं प्रहरी कार्यालयलगायतका युनिटले सूक्ष्म अनुसन्धान थालेका हुन् ।

ती युवतीलाई सम्पर्कमा ल्याएर अनुसन्धानलाई अगाडि बढाउने तयारी गरिएको प्रहरीले जनाएको छ । उनले सुन्दरी प्रतियोगिताका आयोजकले आफूलाई बेहोस बनाई बलात्कार गरेको तथा तस्वीर र भिडिओ रेकर्ड गरेर ६ महिनासम्म लगातार ब्ल्याकमेलिङ गरेको आरोप लगाएकी छिन् । घटना सार्वजनिक भएपछि दबाबमा परेको प्रहरीमा कुन कसुरमा अनुसन्धान अगाडि बढाउने भन्नेमा अन्योल देखिएको छ ।

‘बलात्कारमा चलाउने हो भने हदम्याद सकिएको छ । अन्य कुन कसुर आकर्षित हुने भन्नेमा अध्ययन गर्दैछौँ । घटनामा संलग्न भएका भनिएकालाई नजिकबाट निगरानी गरिरहेका छौं’, अनुसन्धानमा खटिएका एक अधिकारीले भने ।