बान्नीगढी-४ मा ३० वर्षपछि कांग्रेसको किल्ला भत्कियो

मंगलसेन । अछामको बान्नीगढी जयगढ गाउँपालिका- ४ तिमिल्सैनमा नेपाली कांग्रेसको परम्परागत गढ भत्किएको छ । ३० वर्षपछि नेकपा एमालेले कांग्रेसको किल्लामा गठबन्धनलाई पराजित गर्दै विजय हात पारेको हो ।

तिमिल्सैनमा एमाले उम्मेदवार किरणबहादुर खत्रीको प्यानलै विजयी भएको हो । एमाले उम्मेदवार खत्रीले ३७९ मत प्राप्त गरी जित हासिल गरे । नेपाली काँग्रेसका उम्मेदवार दान बहादुर ठकुल्लाले २९९ मत प्राप्त गरे ।

एमाले प्यानलबाट सदस्यहरुमा झुप्री ठकुल्ला, दलित महिला सदस्य खुश्बु आउजी, खुल्ला सदस्य झँकर बोहोरा र विष्णुप्रसाद तिमिल्सिना विजयी भए ।

बान्नीगढी गाँउपालिकाको तिमिल्सैनमा २०४९ सालयता निरन्तर कांग्रेस विजयी हुँदै आएको थियो । अछाममा तिमिल्सैन र गाज्रालाई नेपाली कांग्रेसका परम्परागत गढका रुपमा लिइन्छ ।

एमाले सुदूरपश्चिम प्रदेशका उपाध्यक्ष एवं पुराना वामपन्थी नेता कमल तिमिल्सिनाको गृह वडा भएकाले पनि तिमिल्सैनको निर्वाचनलाई महत्वका साथ हेरिएको थियो ।