गठबन्धनविरुद्ध कलैया उपमहानगरमा एमालेको सहज जित : विनोद साह मेयर, रौशन पर्विन उपमेयर

काठमाडौं । सत्ता गठबन्धनलाई सहज पराजित गर्दै बाराको कलैया उपमहानगरपालिकामा एमालेले आश्चर्यजनक नतिजा निकालेको छ ।

अघिल्लो पटक १८४ मतले कांग्रेसका राजेश रायसँग पराजित भएका विनोद साह यस पटक उनै राजेशलाई गठबन्धनको सहयता हुँदा पनि ६ हजार मतले पराजित गरेर मेयर बनेका छन् ।

मेयरमा एमालेका विनोद साहले २२ हजार ९६ मत ल्याएर जित हात पारे। उनका प्रतिस्पर्धी नेपाली कांग्रेसका राजेश राय यादवले १६ हजार ८७६ मत पाएका छन्।

उपमेयरमा एमालेकी रौशन परविन विजयी भएकी छन् । परविनले १७ हजार ३३५ मत ल्याइन् । उनका प्रतिस्पर्धी जनता समाजवादीका पूर्व सांसद समेत रहेका प्रमोद गुप्ताले १६ हजार ७७० मत पाए।

२०७४ को चुनावमा कलैयाको मेयर र उपमेयर दुवै कांग्रेसले जितेको थियो । यस पटक बलियो गठबन्धन भएका कारण एमालेले जित्ने लिस्टमा कलैयालाई राखेको थिएन ।

देशकै ११ उपमहानगरपालिकामध्ये उपमेयर बन्ने रौशन पर्विन पहिलो मुस्लिम महिला भएकी छन् ।